Gschmelzde Worschdspatza

Heit bassiert was Bsonders bei zimtkringel. I glaub, i schreib heit den Ardigl, der mir persenlich in letschter Zeit sicher mit am meischda Spaß gmacht hat.

Ihr mergat scho, irgendebbas isch anders.

Die Herausforderung isch folgende: Janke von Jankes Soulfood hat Blogger ausm ganza Land ond driaber naus aufgfordert, wenigschdens oimol em Heimatdialegt zu schraiba. Egal, obs no oiner verschdoht, oder au et. Ond dann soll meglichschd nadierlech au no s bassende Gericht auf dr Disch komma. Also guad. Bei mir wärat des jetzt gschmelzde  Worschdspatza und dr Dialegt wär, was jetzt evenduell ed so arg verwondert, Schwäbisch.

Datsächlich schwätzt mr in onserm Eck des sogenannte Honoratiorenschwäbisch. Falls´r a Definitio drfier breichdat, die wär no beim wunderbara Sebastian Blau zu finda: Glick!

Wie des kommt? Ganz oifach: An am guada Dag seh i von onserm Garda aus en der Ferne dr Fernsehdurm vo Stuagard und en´d andere Richtong d blaua Mauer vo dr Alb. Sprich: I wohn aufm Land, aber dr Stadt isch et weit ond em andere Eck hockt drzua no Tübinga, also hemmr au a Bissle Gelehrsamkeit em Nagga. Oder nommole ganz anders: Mir wohnat im Speckgierdl von der Stadt, aber neba dr Mischde vom Baur. Ond deshalb hab i au a recht ländlichs ond alds Rezebt ausgsuacht. Versuachat amole, ob`r verstandat, was i schreib!

Ibrigens hen dia Spatza wenig mit Spätzla zom do. Man beachte dr Onderschied!

 

Fir zwoi bis drei Hongrige:

2l Floischbriah

300g Woizamähl

200g grauchte Schengaworscht

1 große Zwiebl

4 Oier

1 Weckle vom Vordaag

200ml lauwarma Milch

2 EL Peterleng ghackt

Salz, Pfeffer und a Bissle Muskatnuss

3 EL Buddr (bei ons hoißts ibrigens DER Buddr, dofür DES Deller)

 

• Weckle en dr lauwarme Milch eiwoicha
• aus Mähl ond Oier samt em Weckle ond dr Milch an zäha Doig rühra. Achdong, der bebbt, des isch aber richtig so.
• Schengaworscht und Zwiebla fei würfla
• Zwieblwirfela en 1 EL Buddr hellbraun anröschta ond abkiehla lassa
• Pederleng fei schneida, falls net scho gschea
• ahkühlde Zwiebl, Kreidr und Worscht zum Doig rühra ond mit Salz, Pfeffer ond Muskat wirza
• Floischbriah zom Sieda brenga, mit zwoi Essleffl Doignogga abstecha ond en dr hoißa Briah gar ziehga lassa, bis se obadruff schwemmad
• Nogga abtropfa lassa ond en dr reschdlicha Buddr ahröschda 

Traditionell geits drzua an griena Salad. Ohahgrödschdat isst mer dia Spatza au en dr Briah und an Kardoffelsalad drzua. Ond vielleicht an Moschd, aber soweit wella mr et obedengt ganga. Des wär sonscht dr Schwabo-Overkill!